Tveir Íslendingar handteknir í tengslum við kannabisræktun á Spáni

Tveir Íslendingar voru í síðasta mánuði handteknir í tengslum við umfangsmikla kannabisræktun í bænum San Miguel á Spáni. Þeir eru jafnframt grunaðir um að hafa svikið út rafmagn fyrir 22 þúsund evrur, sem samsvarar rúmlega þremur milljónum íslenskra króna.

Frá þessu er greint á héraðsmiðlinum Diaroinformacion en þar segir að alls fjórir hafi verið handteknir í aðgerð lögreglu í febrúar. Um sé að ræða tvær konur og tvo karla á aldrinum 23 til 35 ára.

Gerðar voru upptækar alls 76 maríúanaplöntur sem voru allt að sextíu sentímetra háar, 2.600 grömm af þurrkuðu maríúana og 1140 græðlinga í 19 bökkum, í tveimur húsum sem voru sérútbúin til slíkrar ræktunar.

Rannsókn hófst eftir að lögreglu barst nafnlaus ábending í tölvupósti. Fólkið hefur allt verið yfirheyrt vegna málsins, en ekki kemur fram hvort ákæra hefur verið gefin út.

Utanríkisráðuneytið gat ekki gefið upplýsingar um málið þegar eftir því var leitað.

Þrír Íslendingar voru handteknir á svipuðum slóðum í fyrra í tengslum við háþróaða kannabisverksmiðju. Um umfangsmiklar aðgerðir spænska þjóðvarnarliðsins var að ræða.