Árekstur tveggja jeppa á Reykjanesbraut

Töluverður viðbúnaður var við Hvassahraun á Reykjanesbrautinni í hádeginu í dag eftir árekstur tveggja jeppa. Umferð í suðurátt tafðist í nokkurn tíma vegna árekstursins.

Samkvæmt upplýsingum frá Brunavörnum Suðurnesja voru báðir ökumenn fluttir á sjúkrahús til skoðunar en meiðsli þeirra voru ekki alvarleg.

Annar bíllinn var með kerru í eftirdragi og var hinum bílnum ekið aftan á kerruna. Töluvert tjón varð á bílunum en skyggni var nokkuð slæmt. Búið er að opna fyrir umferð á nýjan leik.