Allt að 40 metra hviður undir Hafnarfjalli

Undir Hafnarfjalli verða vindhviður 30 til 40 metrar á sekúndu fram á kvöldið. Einnig er hvasst á Kjalarnesi. Reiknað er með snjókomu og síðar slyddu suðaustanlands og austur á Austfirði. Þar eru horfur á talsverðri ofanhríð til fjalla allt til morguns.

Þetta kemur fram í tilkynningu frá Vegagerðinni.

„Vegurinn um Hvalnes- og Þvottáskriður verður lokað í kvöld kl. 22.00 vegna snjóflóða og skriðuhættu, lokað verður í  nótt og skoðað í fyrramálið.

Færð og aðstæður

Hálkublettir og þoka er á Hellisheiði en hálkublettir í Þrengslum.  Ófært er á Mosfellsheiði.  Annars er hálka, hálkublettir eða snjóþekja á flestum vegum á Suðurlandi, þó síst á Hringveginum.

Hálka eða hálkublettir er víða á Vesturlandi. Lokað á Fróðárheiði.

Á Vestfjörðum er hálka eða hálkublettir á flestum leiðum og eitthvað um snjóþekju og skafrenning. Þæfingsfærð og skafrenningur er á Kleifarheiði og á Klettsháls.

Það er talsvert autt eða aðeins í hálkublettum á Norðurlandi vestra, þó er hálka víða á útvegum. Snjóþekja og skafrenningur er á Vatnskarði og Öxnadalsheiði. Hálka er á flestum leiðum Norðurlandi eystra, en þó er snjóþekja og skafrenningur á Víkurskarði.

Þæfingsfærð er á Mývatnsöræfum og Háreksstaðaleið en þungfært á Möðrudalsöræfum. 

Nokkur hálka eða hálkublettir er á vegum á Austurlandi. Hálkublettir og éljagangur er á Oddskarði.

Á Suðausturlandi frá Höfn að Mýrdalssandi er snjóþekja og éljagangur en hálkublettir vestur fyrir Vík,“ segir í tilkynningunni.