Ölvaður ökumaður með þrjú lítil börn í bílnum

Lögreglan á Suðurnesjum stöðvaði í fyrradag ökumann sem reyndist vera verulega ölvaður við aksturinn, en hann var með þrjú lítil börn í bílnum. Maðurinn ók sendibifreið sem aðeins er ætluð fyrir tvo farþega og var á leiðinni úr Hafnarfirði til Keflavíkur.

Að því er fram kemur í tilkynningu frá lögreglunni ók maðurinn á tímabili á móti umferð á Reykjanesbraut við Straumsvík og skapaði með því stórfellda slysahættu. Nokkru síðar mætti lögregla svo bifreiðinni við Vogastapa en ökumaðurinn sinnti ekki stöðvunarmerkum. Þegar lögreglubíl var svo ekið upp að hlið hans kom í ljós að hann var að tala í símann við aksturinn. Þá nam hann ekki staðar fyrr en lögregla þvingaði bílinn út í vegaröxlina.

Ökumaðurinn sofnaði svo ölvunarsvefninni í lögreglubílnum á leiðinni á lögreglustöðina. Börnin hans þrjú, tveggja, fjögurra og átta ára, voru án viðeigandi öryggisbúnaðar í sendibílnum sem eins og áður segir er aðeins gerð fyrir tvo farþega. Þá var barnavernd Reykjanesbæjar gert viðvart um málið. Ökumaðurinn var sviptur ökurétti ævilangt.