Hér eru allt of fáar konur í lögreglunni að mati SÞ

Íslenskar lögreglukonur eru allt of fáar og sjónarmið kvenna heyrast ekki í Hæstarétti. Þetta segir í nýrri skýrslu nefndar á vegum Sameinuðu þjóðanna. Nefndin vinnur samkvæmt Kvennasáttmála Sameinuðu þjóðanna [á ensku: CEDAW] og telur mikilvægt að hér verði gripið til aðgerða.

„Ísland á lof skilið fyrir hátt hlutfall kvenna á þingi (43 prósent) og fagnar því að innanríkisráðuneytið hefur gert ráðstafanir til að fjölga konum í framvarðarsveit lögreglunnar. Nefndin hefur aftur á móti miklar áhyggjur af því hve fáar konur eru lögregluþjónar, hve fáar konur starfa við Hæstarétt og hve fáar konur eru við ákvarðanatöku í utanríkisþjónustunni og sveitarstjórnum,“ segir í skýrslunni.

Þá segir: „Nefndin mælir með að ríkið ráðist í skjótar og hnitmiðaðar aðgerðir með skýrum tímaramma?…?til að fjölga konum innan lögreglunnar hratt, fjölga konum í Hæstarétti og í ákvarðanatöku í utanríkisþjónustunni, til að mynda á meðal sendiherra.“

Samkvæmt tölum frá ríkislögreglustjóra frá 1. febrúar 2015 var hæst hlutfall kvenna á meðal starfandi lögregluembætta hjá sérstökum saksóknara, eða 32 prósent. Hjá ríkislögreglustjóra eru 95 prósent starfandi lögreglumanna karlar og engin kona starfar hjá lögreglustjóranum á Norðurlandi vestra. Ein kona er skipuð í Hæstarétt á Íslandi.

Sigríður Björk Guðjónsdóttir, lögreglustjóri á höfuðborgarsvæðinu, segist fagna þessari hvatningu frá Sameinuðu þjóðunum. „Mér líst vel á þetta. Ég trúi því að það sé heppilegt fyrir alla vinnustaði að hafa sem jafnast kynjahlutfall.“

Sigríður segir það mikilvægt að kynjahlutfall sé jafnt svo þjónusta lögreglunnar endurspegli samfélagið. „Við erum að þjóna samfélagi sem er til jafns sett konum og körlum. Ég get ekki ímyndað mér annað en að það sé til góðs að við fjölgum konum í lögreglunni.“

Tölur ríkislögreglustjóra sýna að hjá borgaralegum starfsmönnum lögreglunnar eru konur fleiri í nokkrum flokkum. Lögfræðingar lögreglunnar eru í 67 prósentum tilfella konur. Konur eru í 86 prósentum tilfella skrifstofumenn hjá lögreglunni og þrettán konur starfa við ræstingar hjá lögreglunni en einn karlmaður. Landamæraverðir eru í fleiri tilfellum konur.