Segir það vera út í hött að börn þurfi að bíða í þrjú ár eftir sjálfsagðri þjónustu

Það er óásættanlegt að börn þurfi að bíða í allt að þrjú ár eftir nauðsynlegri geðheilbrigðisaðstoð. Þetta segir formaður ungmennaráðs UNICEF sem kallar eftir úrbótum en ráðið efndi til mótmæla í höfuðborginni í dag.

Ungmennin söfnuðust saman á biðstofu þroska og hegðunarstöðinni í Mjódd síðdegis og mótmæltu á tæknrænan og friðsaman hátt.

„Börn eiga ekki heima á biðlistum. Þetta brýtur á börnum og er óásættanlegt,“ segir Arna Dís Arnþórsdóttir, varaformaður ungmennaráðs UNICEF. 

Undir það tekur Sara Manour, formaður ráðsins. „Það á ekki að viðgangast hérna á Íslandi að börn þurfi að bíða í þrjú ár eftir sjálfsagðri þjónustu. Þetta er út í hött“.

Í nýlegri úttekt Ríkisendurskoðunar kemur fram að stjórnvöld brjóti á réttindum barna á Íslandi með löngum biðtíma eftir nauðsynlegri hjálp. Ungmennin krefjast þess að stjórnvöld skilgreini hámarksbiðtíma barna eftir geðheilbrigðisþjónustu líkt og gert hefur verið hjá nágrannaþjóðunum.

„Það er ekki bara hægt að segja burt með biðlistana. Það verður að segja hversu lengi er það ásættanlegt.“

Á Alþingi liggur fyrir aðgerðaráætlun í geðheilbrigðismálum til fjögurra ára. Ungmennaráðið bendir á að sú áætlun taki ekki á viðvarandi vanda barna á biðlistum.

„Það skiptir ekki máli hvað er í gangi í þjóðfélaginu. Hvort það er kreppa, verðbólga eða óstöðugur gjaldeyrir. Þetta er forgangsmálefni,“ segir Sara.