Einungis konur í áhöfn vélar Icelandair á alþjóðabaráttudegi kvenna

Konur skipuðu allar stöður í áhöfn vélar Icelandair sem flogið var til New York á alþjóðabaráttudegi kvenna í gær.

Í frétt á vefnum Allt um flug segir að áhöfnin hafi flogið vélinni Hengli (TF-FIX) sem sé lengsta Boeing 757 vélin í flota félagsins.

Þetta er þó ekki í fyrsta sinn þar sem áhöfn sé einungis skipuð konum hjá Icelandair. Þannig gerðist það í fyrsta sinn fyrir tilviljun þann 4. júlí 2013 þar sem flugmenn og flugliðar vélar Icelandair á leið til Heathrow-flugvallar í London voru konur.

Flugmenn vélarinnar í gær voru þær Margrét Elín Arnarsdóttir og Jenna Lilja Jónsdóttir sem var flugstjóri. 

Flugliðarnir voru þær Helga Ragnarsdóttir, Vigdís Braga Gísladóttir, Helga Björg Antonsdóttir, Birna Ruth Jóhannsdóttir og Thelma Ólafsdóttir.