Góð byrjun dugði ekki Drekunum

Hlynur Bæringsson skoraði fjórtán stig og tók níu fráköst er Sundsvall Dragons tapaði fyrir BC Lulea í kvöld, 113-91.

Drekarnir byrjuðu leikinn af miklum krafti og skoruðu 39 stig strax í fyrsta leikhluta. Luleå náði svo að halda Sundsvall í sextán stigum í öðrum leikhluta en staðan að loknum fyrri hálfleik var 55-54, Sundsvall í vil. Luleå náði svo að síga fram úr, hægt og rólega, í þeim síðari.

Hlynur spilaði í tæpar 34 mínútur í kvöld og nýtti fjögur af fimm skotum sínum innan teigs en eitt af fimm þriggja stiga skotum sínum. Hann gaf tvær stoðsendingar í leiknum en tapaði boltanum sex sinnum.

Luleå er í öðru sæti deildarinnar með 38 stig en Sundsvall Dragons í því fimmta með 28 stig.