Marsspá Siggu Kling – Hrútur: Draumar hafa ekki síðasta söludag

Elsku besti hrúturinn minn. Skemmtilegasta tímabilið í þínu lífi er þegar það fer að vora.

Þú ert að fara eiga afmæli svo taktu vel eftir því hvað er að gerast í kringum þig. Lífið hreinlega hristist í kringum þig núna næsta mánuðinn til þess að sýna þér á hvaða ár þú ert að fara.

Einhver óþægileg uppákoma gæti komið upp á og þú dottið á rassinn í einhvers konar merkingu en hafðu í huga að þetta er til þess að leiðbeina þér inn í miklu betra tímabil sem byrjar hjá þér núna í endann á Mars.

Það eru miklar tilfinningasveiflur í kringum þig núna og þú veist ekki alveg hvort þú ert að koma eða fara.

Það er alveg ljóst að draumar hafa ekki síðasta söludag svo vertu þolinmóður elsku hrútur, því þú ert alveg á réttri leið.

Þú tekur einhverja ákvörðun sem hefur í för með sér töluverða áhættu og það er alveg í eðli þínu að vera í essinu þínu þegar þú ert að taka einhverja áhættu. Þú þolir ekki lognmollu svo núna er tíminn að stinga sér aftur og aftur á bólakaf í djúpu laugina og vera alveg skítsama um hvað aðrir eru að segja!

Þú þarft að hafa það að leiðarljósi að gefa alltaf meira en þú tekur því fólk væntir mikils af þér. Ekki tala um það sem lætur þér líða illa við hvern sem er. Veldu áheyrendur þína vel því ef þú gerir það ekki þá kallarðu bara á meira af veseni.

Hentu þessum óþarfa áhyggjum sem eru eitthvað að plaga þig bara beint í ruslið. Því þú ert að skara miklu meira fram úr í því sem þú ert að taka þér fyrir hendur en þú getur ímyndað þér og ert meðvitaður um.

Þú hefur trú á sjálfum þér en hún þarf samt að vera meiri og þú hefur alveg innistæðu til þess.

Sjáðu bara Lady Gaga, hún er alveg týpískur hrútur sem veit hvað hún getur og það er nákvæmlega sá kraftur sem ég vil senda þér fyrir næstu tvo mánuði. Mundu það elskan mín að það er ekkert sem getur hindrað þig og þó þú dettir aðeins á rassinn þá verður upprisan þín bara enn stórkostlegri!

Þú ert að fara inn í sexí tímabil þar sem þú átt stóra möguleika á því að heilla ótrúlegasta fólk með útgeislun þinni.

Frægir hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla grafískur hönnunarsnillingur, Elton John söngvari, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Kristín Þorsteinsdóttir, aðalritstjóri 365 miðla.