Marsspá Siggu Kling – Tvíburi: Miklar líkur á flutningum og breytingum

Elsku hjartans tvíburinn minn. Það er eitthvað svo algengt að þú sért eitthvað að bíða. Bíða eftir að það komi að einhverju aðalatriði, bíða eftir hæsta punktinum, bíða eftir Óskarnum! Þú átt algjörlega að sleppa þessu næstu mánuði.

Ekki vorkenna þér yfir nokkrum sköpuðum hlut og ekki væla yfir neinu. Þú ert undirstaða þess að það er eitthvað fjör hér á landinu svo þú skalt kyrra á þér hugann og þakka fyrir það þúsund sinnum á dag hvað þú ert frábær!

Ef einhver er að stjórna þér elskan mín þá skalt þú láta þér fátt um finnast því það eina sem getur drepið þig úr leiðindum er ef eitthvað er að festa þig niður. Ef þér líður þannig þá skalt þú rífa þig lausan og kalla á frelsið því það er ekkert fallegra en frjáls tvíburi. Til þess að þetta gerist þarft þú að standa með þínum hugsunum og því sem að þig langar til að gera.

Ekki vera með svipuna á bakinu á þér að reyna að þóknast öðrum því að þú þarft ekki nema að leggja af stað og þá ert þú orðinn forystusauður og aðrir munu fylgja þér.

Það eru miklar líkur á flutningum og einhverjum breytingum hjá þér næstu mánuði. Þú munt finna kjarnann þinn og hvað það er sem þú vilt. Mundu að þú þarft bara að líta í spegilinn, gefa sjálfum þér fimmu og þá færð þú hana til baka.

Ekki óttast morgundaginn. Það er ekki til neins, hann er ekki til núna en það er dagurinn í dag svo sannarlega. Einbeittu þér að honum.

Þú býrð yfir sjarma kvikmyndastjörnu. Talaðu frá hjartanu og ekki vera með neina yfirborðsmennsku, þannig verður þú sannur sigurvegari.

Þú ert mikill daðrari og ert svo sannarlega góður í því og nú þarft þú að daðra aðeins við lífið því þá mun lífið daðra við þig til baka! Júpíter gefur þér mikinn kraft fram í miðjan maí og þú skalt nýta þér það til þess að byggja grunn að góðu sumri.

Það eru svo miklu fleiri skotnir í þér en þú heldur elsku tvíburinn minn, þú þarft bara að fatta það.

Þinn dásamlegi húmor á eftir að hafa áhrif á svo margt í kringum þig. Þú getur líka verið svo kaldhæðinn og það er ekkert nema spennandi og skemmtilegt og þú skalt nýta þér þennan húmor í leiðina til hamingjunnar.

Frægir tvíburar: Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland.