Sjúkrahótel bráðnauðsynlegt íbúum landsbyggðarinnar

Bjarni Jónasson, forstjóri Sjúkrahússins á Akureyri, segir það alvarlegt mál verði ekkert sjúkrahótel starfrækt í höfuðborginni eftir 30. apríl næstkomandi. Landspítali sé þjóðarsjúkrahús og þurfi að geta sinnt öllu landinu.

„Til Landspítala koma margir sjúklingar utan af landi og því brýnt að þeir sjúklingar geti nálgast þjónustuna hnökralaust. Því er bráðnauðsynlegt að fyrir hendi sé sjúkrahótelþjónusta fyrir þá einstaklinga. Sjúkrahótel er mikilvægur liður í þjónustu við sjúklinga sem þurfa að sækja heilbrigðisþjónustu langa leið,“ segir Bjarni.

Fyrir skömmu rifti Heilsumiðstöðin samningi sínum við Sjúkratryggingar um rekstur sjúkrahótels við Ármúla. Taldi fyrirtækið sig ekki geta rekið þjónustuna áfram í óbreyttri mynd og vera bitbein tveggja opinberra stofnana. Samningur um rekstur sjúkrahótelsins rennur út þann 30. apríl næstkomandi. Eftir þann tíma verður ekkert starfandi sjúkrahótel á höfuðborgarsvæðinu ef áfram heldur sem horfir.

Formaður velferðarnefndar Alþingis, Sigríður Ingibjörg Ingadóttir, segir þessa þjónustu skipta miklu máli fyrir Landspítalann og skorar á stjórnvöld að drífa í að leita leiða til að sjúkrahótel verði starfrækt áfram. „Það er mikilvægt að stjórnvöld hafi snör handtök og finni lausn á þessum vanda. Á Landspítalanum vinnur fólk undir miklu álagi og er þessi vandi aðeins til að auka á álag heilbrigðisstarfsfólks. Einnig er það ódýrara fyrir hið opinbera að starfrækja sjúkrahótel en að hafa einstaklinga inni á legurýmum spítalans,“ segir Sigríður Ingibjörg.

Á Akureyri gerðu Sjúkratryggingar rammasamning við tvö gistiheimili að loknu útboði um gistingu fyrir sjúklinga Sjúkrahússins á Akureyri sem koma langt að og þurfa gistingu. Sá möguleiki er einnig fyrir hendi í Reykjavík, að nýta sams konar úrræði, það er að gera samninga við fjölda gististaða um að taka að sér sjúkrahótelþjónustu og fjölga þannig rúmum fyrir sjúklinga.

Ríkisendurskoðun hefur gefið út skýrslu um framkvæmd samninga Sjúkratrygginga við ríkið og átelur heilbrigðisráðuneytið fyrir að hafa ekki stigið inn í erfið samskipti milli stofnana. Telur Ríkisendurskoðun að höggva hefði þurft á hnúta fyrir löngu.