Mannskæð sjálfsmorðssprengjuárás í Kabúl

Tuttugu eru látnir og að minnsta kosti 29 til viðbótar særðir eftir sjálfmorðssprengjuárás við lögreglustöð í Kabúl, höfuðborg Afganistans, í dag.

Að því er breska ríkisútvarpið greinir frá, ber fregnum ekki saman um það hvort meirihluti hinna látnu hafi verið lögreglumenn eða óbreyttir borgarar. Að sögn yfirvalda kom árásarmaðurinn sér fyrir í röð fólks sem var á leið inn á lögreglustöðina.

Talíbanar segjast hafa verið á bak við árásina, sem er ein margra í borginni undanfarna mánuði. Er talið að þær eigi að kippa stoðunum undan friðarviðræðum milli talíbana og stjórnvalda.

Talsmaður hersveita Atlantshafsbandalagsins (NATO) í Afganistan segir árásina sýna fyrirlitningu talíbana í garð laga og reglu. Árásir þeirra á fólk sem á að gæta afganskra borgara sýni að þeir búi yfir engri framtíðarsýn fyrir Afganistan.