Boðar til þingkosninga á Írlandi í lok mánaðar

Enda Kenny, forsætisráðherra Írlands, hefur tilkynnt að hann muni biðja forseta landsins, Michael D Higgins, um að rjúfa þing og að boðað verði til þingkosninga í landinu föstudaginn 26. febrúar.

Ljóst er að kosningabaráttan verður ein sú stysta í sögu landsins, en nýtt þing mun koma saman þann 10. mars.

Þingmönnum landsins kemur til með að fækka úr 166 í 158 og sömuleiðis mun kjördæmum fækka úr 43 í fjörutíu.

Kenny er leiðtogi flokksins Fine Gael og tók við embætti forsætisráðherra árið 2011.

Skoðanakannanir benda til þess að Fine Gael muni bera sigur úr býtum í kosningunum. Kenny yrði þá fyrsti leiðtogi Fine Gael til að gegna embætti forsætisráðherra lengur en eitt kjörtímabil, allt frá því að Írland hlaut sjálfstæði frá Bretlandi árið 1922.

I am seeking a dissolution of Dáil Éireann today with the election to be held on February 26th.https://t.co/R5JnwC3XFB

— Enda Kenny (@EndaKennyTD) February 3, 2016