Eins árs gömul sænsk stúlka lést eftir fall af svölum á Kanarí

Eins árs gömul sænsk stúlka lést eftir að hafa fallið af svölum á Kanaríeyjum í gærkvöldi. Talsmaður sænska utanríkisráðuneytisins staðfestir þetta í samtali við þar sænska fjölmiðla.

SVT greinir frá því að stúlkan hafi fallið fimm til átta metra.

Upplýsingafulltrúi ferðaskrifstofunnar Vings segir í samtali við fréttastofuna TT að slysið hafi orðið á hótelinu Sunwing resort í Argineguin um klukkan 18:45 að staðartíma í gær.

Gestur á hótelinu segir að stúlkan hafi fallið tvær hæðir niður og lent á bárujárnsþaki.

Að sögn talsmanns ferðaskrifstofunnar standast svalirnar á hótelinu allar öryggiskröfur spænskra yfirvalda. Ekki sé talið að um brot hafi verið að ræða en að lögregla sé með málið til rannsóknar.