Hækkun yfirborðs sjávar meiri en áður var talið

Vísindamenn hafa til þessa vanmetið hækkun yfirborðs sjávar sem rakin er til hlýnunar jarðar og gæti hækkunin jafnvel verið tvöfalt meiri en áður hefur verið talið. Þetta eru niðurstöður rannsóknar sem þýskir vísindamenn gerðu og voru birtar í virtu vísindatímariti í gær.

Hækkun yfirborðs sjávar má rekja til tveggja þátta, bráðnunar jökla og þeirrar staðreyndar að vatn þenst út með hækkandi hitastigi. Hingað til hefur verið talið að aukin þennsla leiði til hækkunar sem nemur um einum millimetra á ári en rannsóknin sýnir að hækkunin er töluvert meiri, eða einn og hálfur millimetri.

Þá kom einnig fram að hækkun sjávar er mun meiri á vissum stöðum en á öðrum og þannig er sjórinn í kringum Filippseyjar að hækka fimm sinnum meira en meðaltalið.