Brynjar gefur skít í rannsóknir sem segja að grænmetisætur séu betri í rúminu

Brynjar Níelsson alþingismaður furðar sig á rannsóknum um kynlífsgetu grænmetisæta og telur þær stangast á við allan sinn reynsluheim. 

Brynjar segir svo frá að hann hafi fengið nett áfall þar sem hann var að háma í sig pylsur og lesa í dv.is að rannsóknir sýndu að grænmetisætur væru betri í rúminu en kjötætur.

„Ég hef alltaf haldið að ég væri betri í rúminu en flestir aðrir ef ég fengi að liggja þar í friði. Kannski er ekki átt við það i rannsókninni.“

Þetta segir Brynjar furðu lostinn á Facebooksíðu sinni og hann heldur áfram að furða sig á þessu:

„Fátt fer meira í taugarnar á mér en frasinn "rannsóknir sýna". Einu sinni sýndu rannsóknir að samkynhneigð væri geðveiki og áfengissýki væri bara venjulegur aumingjaskapur. Nú sýna rannsóknir eitthvað allt annað. Gott ef ekki allir aðrir eru geiðveikir eða aumingjar. Einhverjir vinstri menn, sem aldrei hafa farið út fyrir skólalóðina, gerðu rannsókn sem sýndi að vinstri menn væru greindari en hægri menn. Hverjum manni er ljóst að sú niðurstaða er auðvitað fjarstæða. Nú komast einhverjar náfölar og grindhoraðar grænmetisætur að því að þær séu betri í rúminu en við kjötæturnar. Það bara gengur einfaldlega ekki upp, það sér hver maður.“