Móttaka flóttamanna ráðist af virðingu fyrir mannréttindum

Eygló Harðardóttir félagsmálaráðherra vill að móttaka flóttamanna grundvallist á virðingu fyrir mannréttindum sem hún segir að hafi einkennt norræn samfélög hingað til. Hún hefur áhyggjur af þróun mála í Danmörku og víðar í Evrópu.

Á Alþingi í dag spurði Guðmundur Steingrímsson þingmaður Bjartrar framtíðar Eygló Harðardóttur, sem jafnframt er samstarfsráðherra Norðurlanda, út í viðbrögð íslenskra stjórnvalda við nýlegum dönskum lögum sem heimila að gera eigur flóttamanna yfir tiltekinni upphæð upptækar.

„Staðan eins og hún hefur verið á undanförnum mánuðum í flóttamannamálum í Evrópu er eitthvað sem við höfum verulegar áhyggjur af,“ sagði Eygló og þá ekki síður af því að lögin gerðu þeim sem hefðu stöðu flóttamanna í Danmörku erfiðara að sameinast fjölskyldum sínum.

„Ég vona að hæstvirtur ráðherra komi á framfæri skýrum mótmælum Íslands,  og vonandi ríkisstjórnarinnar sem hún situr í, við þessari hugsun. Mér finnst Norðurlandasamstarfið einna helst byggja á því að við deilum gildum. Við deilum viðhorfi og áherslu á mannréttindi í þessu samstarfi,“ sagði Guðmundur.

Eygló sagði samstarfsráðherrana funda í Helsinki í næstu viku.  Þar ætti meðal annars að ræða aðlögun flóttamanna að norrænum samfélögum. Þá þyrfti að ræða þessi mál ekki bara vegna stöðunnar í Danmörku heldur Evrópu allri.

„Gera það einmitt á grundvelli þeirra áherslna sem sem þingmaðurinn nefnir hér. Á grundvelli þess sem einkennt hefur norræn samfélög. Okkar norrænu gildi. Virðingunni fyrir mannréttindum og að við hugum að því hvernig við getum stutt hvern og einn einstakling sem kemur til okkar og þá sem búa í okkar samfélagi með sem bestum hætti“ sagði Eygló.