Vinnuveitendum áfram almennt óheimilt að skoða einkaskilaboð

Dæmi eru um að vinnuveitendur hafi skoðað einkapóst starfsmanna sinna hér á landi þrátt fyrir að slíkt sé óheimilt. Forstjóri Persónuverndar segir nýlegan dóm Mannréttindadómstóls Evrópu engu breyta þar um. 

Í vikunni komst Mannréttindadómstóll Evrópu að þeirri niðurstöðu að vinnuveitendur megi skoða einkaskilaboð sem starfsmenn þeirra fá senda á vinnutíma. Dómurinn hefur vakið nokkra athygli þar sem fram kemur að þetta eigi við um samskipti starfsmannanna í gegnum spjallforrit og vefpóstforrit.

Forsaga málsins er sú að rúmenskum verkfræðingi var sagt upp störfum árið 2007 fyrir að spjalla við kærustu sína og bróður í gegnum spjallforritið Yahoo Messenger á vinnutíma. 

Forstjóri Persónuverndar segir að varast beri að lesa of mikið í dóminn þar sem lykilatriði sé að umræddur starfsmaður hafi vitað að strangar reglur giltu um þessi mál á hans vinnustað. „Þannig að dómurinn leggur í rauninni mjög mikið upp úr því að starfsmaðurinn í rauninni brýtur geng reglum sem að honum áttu að vera kunnar. Vinnutengd mál þurftu að vera á vinnutíma og algjörlega óheimilt að nota þetta í einkatilgangi,“ segir Helga Þórisdóttir forstjóri Persónuverndar. 

Þannig sé vinnuveitendum á Íslandi almennt áfram óheimilt að skoða tölvupósta og einkaskilaboð starfsmanna sinna. Helga segir dæmi um að vinnuveitendur hér á landi hafi lesið einkapósta starfsmanna sinna án þess að slíkt sé heimilt. „Vissulega hafa komið upp dæmi um það,“ segir Helga.