Bréf Tongs barst til forseta

„Bréfið er komið hingað frá forsetaskrifstofunni, þau skilaboð fylgdu að ráða megi af bréfinu að það sé til forsætisráðherra. Það er póstlagt á Þorláksmessu,“ segir Jóhannes Þór Skúlason, aðstoðarmaður Sigmundar Davíðs Gunnlaugssonar forsætisráðherra, um bréf til ráðherrans frá Anote Tong, forseta Kíribati.

Forseti Kíribati skrifaði bréf til allra þjóðarleiðtoga heims í haust og bað þá um að styðja alþjóðlegt bann við nýjum kolanámum í heiminum í ljósi áhrifa loftlagsbreytinga.

Bréfið hefur verið lengi á leiðinni og áður en það barst lagði Katrín Jakobsdóttir, formaður VG, fram fyrirspurn til forsætisráðherra um afstöðu hans til kröfu Kíribatí og spyr hvort krafa Kíribatí verði studd af Íslands hálfu.

Sigmundur Davíð hefur svarað fyrirspurn Katrínar. Hann segir það almenna afstöðu íslenskra stjórnvalda að ríki eigi rétt til að nýta sínar auðlindir.

„Ísland telur vænlegast til árangurs í baráttu gegn loftslagsbreytingum að efla veg endurnýjanlegrar orku og loftslagsvænnar tækni og lausna,“ segir í svari forsætisráðherra.