Nýársspá Siggu Kling – Sporðdreki: Sjálfsöryggið mun geisla af þér!

Elsku margliti sporðdrekinn minn. Ekki líta svo á að lífið sé barátta því þá vilja svo margir berjast við þig. En það vill enginn berjast við friðelskandi sporðdreka og þannig er best fyrir þig að vera, þá ganga allir í hópinn þinn.

Þú hefur segulmagnaða orku og ættir að hafa fundið fyrir henni síðustu þrjá mánuði, þú magnar bara hreinlega allt upp svo hugsaðu bara að lífið leysi það sem þarf að leysa og það gefi þér þær gjafir sem þú vilt og þarft.

Hin sterka pláneta Júpíter lýsir upp þetta nýja ár og gefur þér magnaðan kraft. Slepptu gamalli sorg úr huga þér, leyfðu leyndarmálunum að fljóta upp á yfirborðið og láttu þau svo bara fara. Það mun gefa þér frelsi til að fljúga!

Þú verður harðákveðinn í að láta í þér heyrast og mörgum í kringum þig finnst að þú hafir eitthvað breyst.

Ástarenglarnir senda þau skilaboð að vera ekki að vesenast í flóknum samböndum sem byggja á ótta, afbrýðisemi eða einungis kynlífi. Það dugar þér ekki. Í ástinni er það heiðarleiki, einlægni og traust sem einkennir orkuna sem þú þarft á að halda til þess að nýja árið verði dásamlegt.

Þú ert búinn að fá skilaboð inn í líf þitt um hvernig þú getir gert það ennþá betra og ef þú ert ekki viss um hvaða skilaboð ég er að tala um þá skalt þú taka eftir því sem verður sagt við þig á næstunni. Það gæti verið að þau væru ekki komin til þín ennþá. Þú munt skilja allt í kringum þig eitthvað svo miklu betur og sjálfsöryggið mun geisla af þér elskan mín. Þetta er happaárið þitt!

Gleðilegt ár, elsku sporðdrekinn minn! Þín Sigga Kling

Frægir sporðdrekar: Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari.