Nýársspá Siggu Kling – Bogmaður: Hafðu þinn eigin hag að leiðarljósi

Elsku bogmaðurinn minn. Nú er þitt ár til að tjilla og slaka á. Og ef þú gerir það ekki meðvitað þá mun lífið kenna þér að gera það.

Þú þarft að henda því sem er eitthvað að hanga yfir þér í burtu og þú veist vel að það sem er að draga þig niður á ekki heima í lífi þínu. Þú styrkir þig með því að taka ákvarðarnir sem hafa þinn hag fyrst og fremst að leiðarljósi. Það hljómar kannski eigingjarnt en hugsaðu þetta svolítið eins og að fara í flug. Ef flugvélin lendir í vandræðum þá þarft þú fyrst að setja súrefnisgrímuna á sjálfan þig áður en þú bjargar hinum.

Ekki vera píslavottur og of góður við alla, þá tapar þú grúvinu og lífsglampanum þínum.

Það virðist eitthvað eins og þú hafir ekki nóg súrefni, þá færð þú köfnunartilfinningu svo núna þarftu að spá í hvað þú vilt og hver þú ert. Ég bið þig um að skrifa lista næstu daga um hvað þú vilt að gerist hjá þér næstu mánuði. Með því setur þú galdra í lífsorkuna þína. Og listinn má bara snúast um þig og það sem þú vilt því þú getur ekki breytt hag annarra, mundu það.

Þetta er mikið galdraár og þú verður að vita að þú ert skipstjórinn í þessari ferð, enginn er ábyrgur fyrir lífsgleði þinni nema þú.

Það væri ágætt fyrir þig að vera svolítið í sviðsljósinu því það gæti fært þig nær draumum þínum.

Þú ert besta mannvera sem til er og þetta ár krefur þig um ákvarðanir svo taktu þær! Í þér býr orka kattarins, þú hefur níu líf og lendir alltaf á löppunum. Til hamingju með þig, elsku duglegi bogmaður!

Gleðilegt nýtt ár, elskan! Þín Sigga Kling

Frægir bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur og Hemmi, hársnillingur á Módus.