Vestfirðingar fá umhverfisvottun

Sveitarfélögin á Vestfjörðum hafa fengið silfurvottun frá umhverfisvottunarsamtökunum EarthCheck. Sveitarfélögin höfðu undanfarin þrjú ár þurft að standast­ viðmið sem umsóknarsvæði en sótt var um vottunina í fyrsta sinn í sumar.

„Við erum í skýjunum með að fá þessa vottun. Þetta er mikið gleðiefni. Við erum búin að vera að vinna að þessu í nokkur ár og það voru þvílík gleðitíðindi að við skyldum standast þessa mælikvarða,“ segir Lína Björg Tryggvadóttir, verkefnisstjóri hjá Fjórðungssambandi Vestfjarða.

Lína Björg segir sveitarfélögin hafa þurft að standast 25 mælikvarða. Nokkur sveigjanleiki hafi verið á mælingunum og máttu sveitarfélögin mælast örlítið undir striki eða yfir. Alls segir hún að þau hafi mælst yfir striki í sautján atriðum.

„Vottunin segir það að sveitarfélögin á Vestfjörðum starfi í anda samfélagslegrar ábyrgðar og vinni að því að svæðið verði sjálfbært. Þau kaupa vottaðar vörur, huga að því að minnka orkunotkun ásamt því að flokka sorp og minnka sorpmagn og þess háttar,“ segir Lína.

Hún segir starfið kallast á við það sem sé að gerast í heiminum í dag og nefnir í því samhengi Parísarsamkomulagið. „Það er verið að reyna að minnka losun óæskilegra efna. Sveitarfélögin sýna samfélagslega ábyrgð með því að taka þátt í þessu verkefni.“

EarthCheck, sem veita vottunina, eru alþjóðleg samtök sem hafa höfuðstöðvar í Ástralíu. Þau eru einu samtökin sem gefa út umhverfisvottun fyrir starfsemi sveitarfélaga og eru þar þættir á borð við innkaup, orkunýtingu, vatnsnotkun og sorpförgun skoðaðir.

Ásamt því að vinna að því að fá fyrrnefnda vottun hafa  sveitarfélögin á Vestfjörðum staðið að verkefninu Plastpokalausir Vestfirðir. Það verkefni er í raun sprottið út frá umhverfisvottunarverkefninu og hefur Lína stýrt verkefnunum hvoru samhliða öðru.

Ásamt sveitarfélögunum á Vestfjörðum eru sveitarfélögin á Snæfellsnesi með vottun frá EarthCheck. Sú er gullvottun.

Fréttin birtist fyrst í Fréttablaðinu.