Ole Gunnar Solskjær, þjálfari Molde, segir að Eiður Smári Guðjohnsen muni klára tímabilið með norska liðinu.
Eiður Smári var í byrjunarliði Molde og lék allan leikinn þegar liðið gerði 2-2 jafntefli við Start á heimavelli í gær.
„Eiður hjálpaði okkur mikið í dag. Ég er mjög ánægður með að hann spilaði allan leikinn eftir EM og smá frí,“ sagði Solskjær eftir leikinn í gær. Hann segir klárt að Eiður Smári klári tímabilið með Molde.
„Hann er ákveðinn í að standa sig með okkur og vonandi eigum við góðan seinni hluta á tímabilinu. Þrátt fyrir að ýmsir segi að hann eigi að segja þetta gott vill hann vera hérna og hjálpa okkur að ná árangri,“ bætti Solskjær við.
Molde er í 7. sæti norsku deildarinnar með 25 stig eftir 16 umferðir.
Eiður Smári hefur skorað eitt mark í 12 deildarleikjum á tímabilinu.
Solskjær: Eiður Smári klárar tímabilið með okkur
