Bróðir Gülen handtekinn í Tyrklandi

Lögregla í Tyrklandi hefur handtekið bróður klerksins Fethullah Gülen, sem Tyrklandsstjórn sakar um að bera ábyrgð á valdaránstilrauninni í landinu í sumar. Tyrkneski ríkismiðillinn Anadolu greinir frá þessu.

Kutbettin Gülen á að hafa verið handtekinn á heimili ættingja síns í Izmir-héraði eftir að ábending barst lögreglu.

Kutbettin er sá fyrsti í systkinahópi Gülen sem er handtekinn, en lögregla sakar hann um aðild að vopnuðum hryðjuverkasamtökum.

Fethullah Gülen á þrjá bræður á lífi og tvær systur. Tyrknesk lögregla hafði áður handtekið tvo frændur Gülen.

Fethullah Gülen er í sjálfskipaðri útlegð í Bandaríkjunum.