Vilja dekkjakurl burt í stað framkvæmda við Hverfisgötu

Fulltrúar Sjálfstæðisflokksins í borgarráði Reykjavíkurborgar vilja að fé sem nýta á í framkvæmdir á Hverfisgötu milli Klapparstígs og Smiðjustígs fari í að skipta út dekkjakurli á gervigrasvöllum borgarinnar. Tillaga þess efnis var lögð fram á fundi borgarráðs Reykjavíkurborgar á fimmtudag.

„Við erum að ítreka það hvað það er mikilvægt að forgangsraða rétt,“ segir Halldór Halldórsson, oddviti Sjálfstæðisflokksins. Halldór telur endurnýjun gervigrasvallanna með dekkjakurlinu meira aðkallandi en framkvæmdir á Hverfisgötunni og vill að dekkjakurlinu verði skipt út á einu ári.

S. Björn Blöndal, oddviti Bjartrar framtíðar og formaður borgarráðs, segir að þegar hafi verið samþykkt aðgerðaáætlun um að leggja nýtt gervigras og skipta út gúmmíkurli á völlum Reykjavíkurborgar á næstu árum. Á þessu ári verður skipt um gras og gúmmíkurl á Víkingsvelli, vorið 2017 á gervigrasvöllum Fylkis og KR auk þess sem skipt verður um gúmmíkurl á gervi­grasvelli Fram í Úlfarsár­dal. Búist er við að kostnaðurinn á næstu þremur árum nemi rúmum 200 milljónum króna. Þá er stefnt að því að endurnýja gervigrasvelli Leiknis árið 2018 og hjá ÍR árið 2019.

Það sé hins vegar ótengt fyrirhuguðum framkvæmdum við Hverfisgötu að sögn Björns. „Það að tengja þetta við gúmmíkurlsmálið er að mínu mati nokkuð langsótt,“ segir Björn.

Nákvæmlega þessir peningar fara ekki í það. Þarna er verið að slá saman ótengdum málum.“

Tillaga um framkvæmdirnar við Hverfisgötu var samþykkt í borgarráði en tillögu Sjálfstæðismanna var frestað. Á Hverfisgötunni, milli Klapparstígs og Smiðjustígs, á að skipta um allar lagnir og brunna auk þess sem gatan verður endurnýjuð og hjólastígar lagðir beggja vegna við götuna.

Björn segir fjármunina komi til vegna þess að ekki takist að ljúka framkvæmdum við Geirsgötu. Það fé sem ekki verði nýtt þar eigi að fara í framkvæmdirnar við Hverfisgötu. Halldór gagnrýnir að féð til framkvæmdanna við Hverfisgötu hafi ekki verið á fjárhagsáætlun ársins. Áætlaður kostnaður Reykjavíkurborgar af framkvæmdunum nemur 109 milljónum króna. 

Fréttin birtist fyrst í Fréttablaðinu 2. apríl.