Tugir leikmanna grunaðir um svindl í sænska boltanum

Stór skandall er í uppsiglingu í sænska fótboltanum eftir að kom í ljós að 43 leikmenn í efstu deildum Svíþjóðar eru grunaðir um að hafa hagrætt úrslitum leikja þar í landi.

Þessir 43 leikmenn eru á leynilista UEFA yfir leikmenn sem eru grunaðir um að hafa eitthvað misjafnt í pokahorninu. Þeir leika allir í úrvals- eða B-deildinni í Svíþjóð.

Meðal annars er verið að rannsaka átta leiki úr B-deildinni frá því í fyrra en ekki liggja nákvæmar upplýsingar fyrir um málið enn sem komið er.

Svissneska fyrirtækið Sports Radar sérhæfir sig í útreikningum á mögulegum hagræðingum á úrslitum leikja og vinnur með UEFA í að koma upp um svindl. Þetta er risafyrirtæki með 1.650 manns í vinnu í 30 löndum. Það hefur einnig aðstoðað fleiri íþróttagreinar.

Sænska knattspyrnusambandið fer varlega í allar yfirlýsingar um málið á þessu stigi og bendir á að þessi mál séu enn í rannsókn.

Á listanum er meðal annars leikmaður sem er grunaður um að hafa brennt viljandi af vítaspyrnu og markvörður sem gaf viljandi mörk.

Þetta mál verður klárlega í umræðunni næstu vikurnar.