Vill að Kópavogsbær lagi hættulegar götur

„Þær eru orðnar mjög holóttar, skemmdar og ljótar,“ segir Guðrún Snorradóttir, formaður Íbúasamtaka Engihjalla, um ástand gatna við Engihjallann. Íbúasamtökin vilja að Kópavogsbær grípi til aðgerða til að laga götur og gangstéttir. Samtökin hafa sent bænum bréf þar sem fram kemur að götur og gangstéttir séu orðnar „verulega illa farnar“.

„Á einum stað við strætóstoppistöð stendur járn upp úr sem er bara hættulegt,“ bætir Guðrún við.

Guðrún segir að erindinu hafi verið vel tekið. Hins vegar hafi engin áform verið kynnt enn. Forsvarsmenn bæjarins hafi einnig lýst yfir vilja til að grípa til aðgerða á íbúaþingi í Engihjalla í nóvember 2014. „Svo hefur ekkert gerst. Við vorum að vonast eftir því fyrir ári síðan að það færi eitthvað inn á fjárhagsáætlun.“ Það hafi ekki gengi eftir en íbúarnir hafi verið vongóðir um að áætlanir færu inn á nýjustu fjárhagsáætlunina. Ekki hafi orðið af því. „Þá fór nú aðeins að hitna í kolunum hjá okkur og þolinmæðin að bresta,“ segir Guðrún. Í kjölfarið hafi samtökin sent bænum bréf.

Þá segir Guðrún Kópavogsbæ vera langt á eftir nágrannasveitarfélögum sínum hvað varðar lagningu hjólreiðastíga. „Það eru engir hjólastígar í Kópavogi,“ segir Guðrún. Hjólreiðafólk þurfi að fara út úr Kópavogi til að fara í hjólaferðir. Hún bendir á að Kópavogur sé orðinn þátttakandi í verkefninu Heilsueflandi bær. „Fyrst að hann er að taka þátt í þessu verkefni, Heilsueflandi bær, á hann að leggja áherslu á að fólk geti valið sér þannig lífsstíl,“ bendir hún á.

„Ég tek alveg undir það með þessum samtökum. Það þarf virkilega að fara í umhverfisátak sem er í kringum þetta stóra samfélag sem er þarna í Engihjalla,“ segir Theódóra S. Þorsteinsdóttir, formaður bæjarráðs Kópavogsbæjar.

Theódóra segir stefnt að því að fara í einhverjar framkvæmdir á þessu ári. Verið sé að kostnaðargreina þær breytingar sem íbúasamtökin hafi lagt til að verði gerðar og í kjölfarið sé stefnt að því að fara í þær. „Þegar við fáum þessa kostnaðargreiningu munum við velja úr þau verkefni sem við getum farið í núna á þessu ári og halda áfram á næsta ári,“ segir Theódóra.