Nauðgunarkæra á Bifröst til rannsóknar hjá lögreglu

Meint nauðgun á Bifröst aðfaranótt miðvikudags er í rannsókn hjá rannsóknardeild lögreglunnar á Vesturlandi. Þetta staðfestir lögregla í samtali við Vísi. DV greindi fyrst frá.

Nauðgunin var tilkynnt lögreglu síðdegis á miðvikudag og fékk þolandi aðstoð lögreglu við að fara á neyðarmóttöku. Tæknideild og rannsóknarlögreglumaður frá lögreglunni á Vesturlandi fóru að Bifröst og unnu að vettvangsrannsókn.

Í kjölfarið var einn maður handtekinn, hann var yfirheyrður og honum þvínæst sleppt úr haldi. Konan segir nauðgunina hafa átt sér stað á háskólasvæðinu við Háskólann á Bifröst. DV hefur heimildir fyrir því að um samnemendur sé að ræða.