Dæmdur fyrir að svíkja rúmar 40 milljónir undan skatti

Héraðsdómur Reykjaness dæmdi í gær karlmann á sextugsaldri í 10 mánaða skilorðsbundið fangelsi fyrir að svíkja rúmlega 40 milljónir undan skatti á árunum 2011 og 2012. Þá var maðurinn jafnframt dæmdur til að greiða 82 milljónir króna í sekt til ríkissjóðs vegna brotanna.

Maðurinn var ákærður fyrir að hafa ekki, sem stjórnarmaður og daglegur stjórnandi einkahlutafélagsins Byggingafélagið Fjörður ekki staðið skil á virðisaukaskattskýrslum félagsins vegna uppgjörstímabilanna september-október og nóvember-desember rekstrarárið 2011 og september-október 2012. Þá var hann einnig ákærður fyrir að hafa ekki skilað virðisaukaskattskýrslum félagsins á réttum tíma vegna tímabilanna janúar-febrúar til og með júlí-ágúst rekstrarárið 2012.

Fyrir dómi neitaði maðurinn sök. Hann var spurður að því hvers vegna virðisaukaskattskýrslum hefði ekki verið skilað, en hann bar ábyrgð á því í rekstri félagsins. Svaraði hann því til að hann hefði ekki vitað betur en að þeim  hafi verið skilað. Varðandi skýrslurnar sem var ekki skilað á réttum tíma kvaðst maðurinn ekki átta sig almennilega á því, þeim hafi átt að skila á réttum tíma.

Þá bar maðurinn upp ýmsar ástæður fyrir því að virðisaukskatti hafi ekki verið skilað. Meðal annars hafi félagið átt útistandandi innskatt sem hann taldi að hefði átt að ganga upp í þessa skuld.

Dómurinn féllst hins vegar á málatilbúnað ákæruvaldsins um að brot mannsins væru fullframin. Þá væri fjárhæðin sem skotið var undan skatti meiriháttar. Var maðurinn því dæmdur til refsingar, 10 mánaða skilorðsbundið fangelsi eins og áður segir, og til að greiða tvöfalda þá upphæð sem hann sveik undan skatti, eða samtals 82 milljónir króna.

Dóm héraðsdóms má sjá í heild sinni hér.