Fundu sex manns á lífi í húsarústum í Manta í Ekvador

Sex manns var í dag bjargað lifandi úr húsarústum í borginni Manta í Ekvador, þremur dögum eftir að öflugur jarðskjálfti reið yfir norðvesturströnd landsins. Einn af þeim sem var bjargað sagði björgunarmönnum að fjórir til viðbótar væru fastir í rústunum.

Skjálftinn, sem var af stærðinni, 7,8 átti upptök sín nálægt bænum Pedernales í Manabí-héraði en bærinn jafnaðist nánast við jörðu í skjálftanum. 413 manns hafa nú fundist látnir og eftir því sem tíminn líður minnka líkurnar á að finna fólk á lífi.

Jafnan er talið að þegar 72 klukkutímar eru liðnir frá skjálfta þá séu afar litlar líkur á að finna einhverja á lífi, en á miðnætti í kvöld að íslenskum tíma verða þrír sólarhringar liðnir frá skjálftanum í Ekvador. Ennþá er 231 saknað og þá slösuðust 2658 manns en þetta eru mestu náttúruhamfarir í landinu í meira en 40 ár.

„Það er fólk fast í rústunum og af lyktinni að dæma er augljóst að það er látið,“ sagði Marco Borja, herforingi í ekvadoríska hernum, í samtali við Reuters en hann var þá staddur í strandbænum Canoa, skammt frá Manta.

Bærinn varð mjög illa úti í skjálftanum og lýsti Rafael Correa, forseti Ekvador, Canoa sem draugabæ í samtali við fjölmiðla fyrr í dag. Sagði hann að 80 prósent af bænum hefði verið jafnaður við jörðu.

Þá er jafnframt ljóst að eignatjón í landinu er gríðarlegt og uppbyggingin mun taka mörg ár.

„Tjónið nemur þúsundum milljóna. Mér reiknast til að þetta séu um 3 milljarðar dala sem er 3 prósent af vergri landsframleiðslu okkar. Uppbyggingin mun því taka mörg ár og þetta verður löng og ströng barátta. Við megum hins vegar ekki gefast upp,“ sagði Correa.