Merktu 12.568 fugla af 77 tegundum á Íslandi í fyrra

Fjöldi merktra fugla á Íslandi í fyrra var 12.568 af 77 tegundum, sem er lítillega undir tíu ára meðaltali. Um vinnu 49 merkingarmanna er að ræða.

Fuglar hafa verið merktir á Íslandi síðan árið 1921 og fer Náttúrufræðistofnun Íslands með umsjón fuglamerkinga. Alls hafa verið merktir 680.720 fuglar af 154 tegundum, mest af snjótittlingi eða rúmlega 80 þúsund fuglar, segir í frétt stofnunarinnar.

Mest var merkt af skógarþresti, 1.683 fuglar. Þar á eftir komu 1.453 kríur, 1.134 lundar, 987 auðnutittlingar og 943 ritur. Ein tegund var merkt í fyrsta sinn hér á landi, ljóshöfðaönd (anas americana).

Frá upphafi hafa verið skráðir 55.285 endurfundir merkja. Árið 2015 var óvenju mikið tilkynnt um endurheimtur og álestra á merki á lifandi fuglum. Alls bárust 2.365 tilkynningar um endurheimtur íslenskra merkja og komu 154 þeirra frá öðrum löndum. Algengastir voru auðnutittlingar eða 1.636 fuglar en þar á eftir komu 172 álftir, 83 sílamávar, 75 æðarfuglar og 44 snjótittlingar.

Langförulasti fuglinn sem endurheimtur var í fyrra var kría sem merkt var sem ófleygur ungi sumarið 2013 í Óslandi við Höfn í Hornafirði. Hún fannst örmagna við Höfðaborg í Suður-Afríku í október síðastliðnum, 11.319 kílómetra frá merkingarstað, þar sem hún bar beinin.