Geta látið fara vel um sig í unglingadeildinni

Unglingar geta á afslappaðan hátt lesið, spjallað lært og vafrað í nýrri unglingadeild sem verður opnuð á morgun í Bókasafni Seltjarnarness.

„Við erum búin að færa til hverja einustu hillu og hverja einustu bók á bókasafninu til að skapa ákjósanlegt pláss fyrir unglingana. Ætlum að opna það á morgun og erum búin að fá Reykjavíkurdætur til að koma fram við það tækifæri,“ segir Soffía Karlsdóttir, sviðsstjóri menningarsviðs á Seltjarnarnesi.

Soffía kveðst hafa fengið til liðs við sig hina fjölhæfu Theresu Himmer, arkitekt og myndlistarmann.

„Theresa leitaði meðal annars ráða hjá Ungmennaráði Seltjarnarness þegar hún hannaði rýmið og er búin að þróa flotta sófaeiningu, eða „Sofa Complex“ eins og hún kallar það.  Þar geta margir verið saman í einum hluta og fáir saman í öðrum. Allt er þetta mjög listrænt, smíðað úr birki og fóðrað með teppi sem skartar ljósmynd eftir Theresu sjálfa. Eftir að teppið var lagt á fengu einingarnar á sig nýjan blæ og virka eins og borg,“ segir Soffía.

Grunnhugmyndin að deildinni er að sjálfsögðu sú að fá krakka á Nesinu og úr Vesturbænum til að sækja bókasafnið, að sögn Soffíu.

„Við höfum undanfarið lagt áherslu á að kaupa unglingabókmenntir, blöð og tímarit sem við trúum að höfði til unga fólksins og ætlum að setja upp sérstakar hillur fyrir það efni.“

Soffía sér fyrir sér að heilir bekkir úr skólunum geti komið í heimsóknir í deildina, þar verði fyrirlestrar haldnir og fleiri viðburðir. „Svo geta unglingarnir verið hér að læra líka. Geta legið í sófunum og látið fara vel um sig, jafnvel haft lappirnar upp í loft ef þeim sýnist svo.“

Rýmið miðar að því að mæta ólíkri samskiptaþörf ungmenna í fámenni eða fjölmenni. Innsetningin samanstendur af sex föstum sætiseiningum og lausum stólum. Þar er hægt að dvelja einn með sjálfum sér eða vera umvafinn stórum hópi vina og allt þar á milli. Formin eru hönnuð fyrir líkama í hvíldarstöðu, sitjandi, hallandi eða liggjandi með fæturna lárétt eða lóðrétt. Þar er hvorki miðja né hápunktur sem skapar jafnræði innan hópsins og ýtir undir lýðræðisleg samskipti.

Smíðaverkstæðið Hjól atvinnulífsins sá um smíðina. Teppið er prentað af EGE í Danmörku sem styrkti verkefnið.