Nóvemberspá Siggu Kling – Bogmaður: Þú sérð heildarmyndina á endanum

Elsku bogmaðurinn minn. Það er eins og þú sért staddur í miðju púsluspili. Það vantar nokkur púsl og þú sérð ekki heildarmyndina enn þá. En ekki örvænta því þetta reddast allt eins og alltaf hjá þér!

Það er að eiga sér stað eitthvað uppgjör í kringum þig í sambandi við fólk og þú finnur fyrir létti þegar það klárast. Þú ert svo miklill friðarsinni og friðurinn mun færa þér fegurð.

Það hentar þér ekki að hafa allt hefðbundið í kringum þig svo það er mikilvægt að brjóta upp leiðinlega ávana. Ef þú gerir það ekki verður þú leiður og hvað er gaman að því?

Það er búin að vera svolítil lægð í kringum þig, eins og á landinu öllu, en nú ert þú að fara á flug og það verða flugeldar í kringum þig í sambandi við hugmyndir og framkvæmd þeirra. Ferðalög og jafnvel flutningar verða í kortunum næstu mánuði og þú verður fullur af tilhlökkun.

Þú tekur stjórnina og málin í þínar eigin hendur og steinhættir að bíða eftir að aðrir geri eitthvað. Við það fyllist þú þeirri orku sem þig vantar og munt í kjölfarið hrífa þá sem þú vilt með þér.

Þú ert að vekja svo mikla eftirtekt svo ástin hefur greiðan aðgang að þér. Sýndu bara svolítið hugrekki í ástamálunum, það er allt sem þarf! Þú hefur, elsku bogmaðurinn minn, alveg nóg sjálfstraust til þess að vera þú sjálfur svo núna er akkúrat tíminn til að taka stórar ákvarðanir og fylgja þeim eftir.

Mottó: Upp með sjarmann!

Frægir bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur og Hemmi, hársnillingur á Módus.