Erpur hitar upp fyrir Pokahontaz

„Þetta eru miklar kanónur og ég hlakka mikið til,“ segir rapparinn Erpur Eyvindarson, betur þekktur sem Blaz Roca. Hann hitar upp fyrir pólsku rapphljómsveitina Pokahontaz sem er á leið til landsins í mars.

Sveitin er geysilega vinsæl og er með tæplega tvö hundruð þúsund læk á fésbókarsíðu sinni og nokkrar milljónir áhorfa á myndböndin sín á YouTube.

„Þeir ætla að koma með uppáhalds pólsku vodkategundina sína. Ætli ég stilli ekki upp borði á sviðinu, með vodkaflösku og klökum og skutli í mig,“ bætir Erpur við. Hann hefur mikinn áhuga á drykkjusiðum og þá sérstaklega pólskum drykkjusiðum og hlakkar því til að skála við pólsku rapparana.