Skarthúsið skellir í lás eftir helgina

Skarthúsinu við Laugaveg 44 verður lokað eftir helgi eftir tuttugu og þriggja ára veru þar. „Það er bara komið að þessum tímapunkti, nú ætla ég að breyta til og fara að taka því rólega,“ segir Eygló Dóra Garðarsdóttir, eða Dóra eins og hún er kölluð, eigandi Skarthússins. Hefur hún staðið vaktina við búðarborðið í öll þessi ár og hefur sannarlega byggt upp dyggan kúnnahóp.

„Hingað hafa konur komið sem hafa byrjað að versla sem litlar stelpur, viðskiptavinirnir taka ekki vel í þetta,“ segir Dóra og skýtur borubrött inn í að „maður kemur í manns stað“.

Dóra þvertekur fyrir að hafa fundið fyrir samdrætti í verslun á þessum tuttugu og þriggja ára ferli, og segir alltaf hafa verið nóg að gera.

Það sé því ekki á þeim forsendum sem hún hætti í kaupskap. Vissulega hafi hún séð á eftir mörgum verslunum, en ansi örar breytingar hafa verið í gegnum tíðina á verslunum á Laugaveginum, og margar hverjar hafi stoppað ansi stutt við.

„Það sem stendur hvað hæst upp úr á þessum ferli er án nokkurs vafa starfsfólkið og þessir skemmtilegu viðskiptavinir. Ég hef fengið að kynnast mörgu skemmtilegu fólki, en þetta hefur engu að síður verið heilmikil vinna,“ útskýrir Dóra. Spurð hvort hún leggi skartsölu alfarið á hilluna, segir hún svo vera, en þó sé hún alls ekki sest í helgan stein, enda rétt sjötíu og þriggja ára gömul.