Sjálfstæði Hjúkrunarfræðideildar HÍ og A-próf

Verðandi hjúkrunarfræðingar BS frá Hjúkrunarfræðideild HÍ þurfa á fyrsta námsári 2015-2016 að nema; vinnulag og upplýsingatækni, heilbrigðismat, hjúkrun og hjúkrunarstarf, líffærafræði, frumulífeðlisfræði, siðfræði, almenna hjúkrun I, félagsfræði, sálfræði, samskipti, lífeðlisfræði I, næringarfræði og tölfræði. Deildarforseti Hjúkrunarfræðideildar HÍ, Helga Jónsdóttir, hitti naglann á höfuðið í Fréttablaðinu 20. apríl þegar hún segir: „Þekking í hjúkrunarfræði er nátengd þekkingu í líf- og heilbrigðisvísindum, hugvísindum, félagsvísindum…“ Hvernig Helga kemst að því að A-prófið sé „góður kostur til að segja fyrir um hverjir eru líklegir til að farnast vel í námi í hjúkrunarfræði“ er mér með öllu óskiljanlegt, því A-prófið mælir ekki ofangreinda þekkingu.

Síðan segir Helga: „Einnig hefur komið í ljós að tengsl eru milli árangurs í íslensku, ensku og stærðfræði í námi til stúdentsprófs og árangurs í numerus clausus-prófi en þessar sömu námsgreinar eru mikilvægir þættir A-prófsins.“ Til þess eru einmitt framhaldsskólar! Hjúkrunarfræðinemar eru búnir að taka próf og útskrifaðir í íslensku, ensku og stærðfræði. A-prófið er samið fyrir Námsmatsstofnun, en mér vitanlega hefur Námsmatsstofnun enga faglega þekkingu á hjúkrunarfræði. Með tilkomu A-prófs er því verið að gera grundvallarbreytingar á námi í hjúkrunarfræði við HÍ, þar sem alls óskyld stofnun, sem á engin tengsl við hjúkrunarfræði, er farin að velja hjúkrunarfræðinga framtíðarinnar.

Inntökupróf

Hjúkrunarfræðideild HÍ heyrir undir Heilbrigðissvið HÍ og á ekki að láta aðra segja sér fyrir verkum. Innan Hjúkrunarfræðideildar HÍ er reynsla, færni og þekking og deildin á að búa yfir sjálfstæði til að velja hjúkrunarfræðinga framtíðarinnar. Inntökupróf, sem þreytt væri í júní ár hvert, ætti að vera samið af starfsmönnum Hjúkrunarfræðideildar HÍ og reyna á hæfni í líf- og heilbrigðisvísindum, hugvísindum, félagsvísindum og kannski því mikilvægasta, félagsfærni. Slíkt inntökupróf mun verða miklu farsælla við val á verðandi hjúkrunarfræðingum, enda prófað í því sem verðandi hjúkrunarfræðingar eru að fara að læra, en ekki í því sem þeir eru búnir að læra í framhaldsskóla!