Nýjasta æðið að hreinsa hárið með c-vítamíni

Á síðunni Beauty tips hafa stelpur á öllum aldrei deilt reynslusögum af því hvernig þær hafa hreinsað lit úr hárinu með því að blanda C-vítamíni út í sjampóið sitt.

C-vítamín er þekkt fyrir að hafa lýsandi áhrif bæði á húð og hár. Töflurnar eru muldar niður, til dæmis í blandara og þeim blandað við sjampóið. Blandan, sem verður mjög þykk, er borin í hárið og látin bíða í um klukkustund áður en skolað er úr.

Þær þrjár stúlkur sem Fréttablaðið náði tali af voru sammála um að þetta hefði áhrif, en þau voru mismikil. Það kom þeim öllum á óvart að munurinn sást ekki fyrr en sjampóið var skolað úr og hversu mjúkt hárið var á eftir.

Sátt við útkomuna

„Ég er ljóshærð í alvörunni, en hef litað mig margoft, bæði á stofu og heima. Það hefur verið bæði fjólublátt og rauðbrúnt. Ég setti blönduna í þurrt hárið, og lét bíða í rúma klukkustund og þetta virkaði,“ segir Aníta Magnúsdóttir, ein þeirra sem prófuðu.

„Það varð smá appelsínugult fyrst, en nú er appelsínuguli tónninn að fara og ég er komin með náttúrulega litinn minna aftur.“ Hún segir hárið ekki hafa þornað við hreinsunina, en það hafi verið þurrt fyrir eftir alla litunina áður. „Persónulega finnst mér það bara mýkra núna,“ segir hún.

Úr svörtu í rautt

Guðbjörg Ólafsdóttir hefur svipaða sögu að segja. „Ég var alveg svarthærð og núna er hárið á mér eiginlega rautt, sem ég er mjög sátt með. En ég hafði litað það rautt áður en ég litaði það svart,“ segir hún. „Ég notaði 60 töflur og heilan brúsa af sjampói, nuddaði mjög vel inn og setti svo poka yfir og lét bíða í 45 mínútur.“ Hún segir hárið vera mjög mjúkt og miklu mýkra en það var áður. „Það var rosalega þurrt, enda hafði ég litað það bæði á stofu og heima. Ég aflitaði mig einu sinni og þá missti ég mikið hár, þannig að ég var smá stressuð að það myndi gerast núna, en það gerðist ekki núna.“

Gekk og gekk ekki

„Ég hef litað á mér hárið svart síðan ég var tólf ára, þannig að ég veit eiginlega ekki hvernig það er á litinn í raun og veru. Þetta gekk og gekk ekki, en það eina sem gerðist hjá mér var að rótin lýstist talsvert upp,“ segir Esther María Ragnarsdóttir, en hún var alveg svarthærð þegar hún prófaði.

„Ég gerði þetta aftur og þá komu eins og strípur í svarta litinn,“ segir hún. Eftir þetta litaði hún hárið þó aftur. „Það er greinilegt samt að þetta hreinsaði rótina, því hún er enn ljósari eftir að ég litað það.“

Fréttablaðið hafði samband við fjórar hárgreiðslustofur, en þar höfðu hárgreiðslumeistarar ekki heyrt um þessa aðferð. Allir voru þó sammála um að þetta væri eitthvað sem þeir yrðu að prófa, þótt þau hefðu ekki mikla trú á að þetta myndi virka.