BA-ritgerð um mömmuhópa

Í nútímasamfélagi er svo komið að konur hafi vart fengið staðfestingu á þungun áður en þær hafa sótt um aðgang að tilheyrandi bumbuhóp. Hópurinn umbreytist svo í mömmuhóp í takt við tímann.

Samkvæmt rannsókn Regínu Jónsdóttur til BA-gráðu í félagsfræði frá Háskóla Íslands hafa þessir hópar töluvert mikið vægi í tilveru ungra, einhleypra mæðra á Íslandi í dag. „Helsta stuðningsnetið er samtvinnað úr foreldrum og aðstandendum, en þessir mömmuhópar á Fésbókinni eru nú farnir að sækja í sig veðrið og verða sífellt veigameiri,“ segir Regína.

Hópurinn sem Regína skoðaði í rannsókn sinni, var samsettur úr einstæðum mæðrum undir tuttugu og fimm ára aldri.

„Sumar sögðu svona hóp hafa hreinlega bjargað geðheilsunni og hefði á tímabili endurspeglað allt þeirra félagslíf,“ segir Regína, en niðurstöður rannsóknarinnar sýndu að auki fram á að félagslegur stuðningur við hópinn skipti gríðarlegu máli. Í mömmuhópunum skapist lítið, læst samfélag þar sem konurnar leyfi sér, mismikið þó, að opna sig innan hópsins og undir formerkjum trausts. „Þó voru þær meðvitaðar um að þarna væru samankomnar ólíkar konur úr öllum áttum, sem erfitt væri að treysta kannski,“ segir Regína og bætir við að það geti haft mikla þýðingu fyrir konur sem kannski eigi ekki sterkt félagslegt net.

Regína segir einangrun þó óhjákvæmilegan fylgifisk þess háttar nútímasamskipta, „Þegar þær treysta alfarið á þennan hóp og leita lítið eða ekkert út fyrir hann, getur það haft andstæð áhrif. Að auki geta glansmyndir samfélagsmiðlanna haft þau áhrif á konurnar að þær upplifi sig á neikvæðan hátt í samanburðinum við hinar, og þannig verði sjálfsmyndirnar fyrir hnjaski,“ bendir Regína á.

Segir Regína hugmyndina upphaflega hafa komið vegna þess að hún var í sömu sporum, en hún á árs gamla dóttur. „Fyrst til að byrja með eftir fæðingu barnsins, er félagslífið mikið bara þarna,“ segir hún og bætir við að sér hafi þótt áhugavert að skoða þetta nánar og hafi þá komið í ljós að ekki var fordæmi fyrir svona rannsókn hérlendis. „Þetta er svo merkilegt nefnilega, og fullt af spurningum sem skjóta upp kollinum. Hvernig fóru mæður til dæmis að áður en þessir hópar komu til?,“ spyr Regína og skellir upp úr í lokin.