Heldur betur eftirminnileg leikhúsferð

Lína Langsokkur heldur áfram að heilla leikhúsgesti á öllum aldri og ekkert lát er á vinsældum leikritsins í Borgarleikhúsinu, í leikstjórn Ágústu Skúladóttur. Sýndar hafa verið yfir 60 sýningar og hefur verið uppselt á þær allar.

Ingimundur Gestsson lagermaður var á sýningunni um Línu um síðastliðna helgi ásamt átta ára tvíburadætrum sínum, Elísabetu og Katrínu. Herra Langsokkur sótti þau þrjú út í sal og færði þeim blóm og gjafakort fyrir fjóra á sýninguna Billy Elliot í tilefni þess að eitt þeirra var gestur númer þrjátíu og fimm þúsund.

„Þetta var rosalega skemmtileg sýning og þvílíkt gaman að fá svona aukabónus,“ segir Ingimundur þegar slegið er á þráðinn til hans.

En var honum og dætrunum sagt frá því þegar þau gengu í salinn að þau væru svona heppin? „Nei, ekki fyrr en í lok sýningar. Þá sagði Örn Árnason, í gervi herra Langsokks, að þetta væri nú ekki alveg búið og tilkynnti að gestur númer þrjátíu og fimm þúsund væri í salnum, hann sæti í sætaröð númer átta í sæti númer tíu.

Svo beindist kastljósið að annarri dóttur minni og nafn konu minnar Elínar Bjarkar Björnsdóttur var lesið upp því hún hafði keypt miðann minn, en var ekki með okkur. Við drifum okkur öll þrjú upp á svið og tókum við gjöfunum. Svo fengum við að fara inn á sviðið og skoða leikmyndina, inn í búningsklefa til leikaranna og sjá nánast hvernig allt fer fram baksviðs. Þetta verður heldur betur eftirminnileg leikhúsferð fyrir okkur öll.“

Ingimundur segir dætur hans hafa fengið miðana á Línu í jólagjöf frá ömmu þeirra, þannig að segja megi að hver gjöfin reki aðra. „Við erum dugleg að fara í leikhús,“ segir hann. „Þannig að þessir miðar á Billy Elliot koma sér vel.“