Leitar að framandi dýrum til þess að leika í myndbandi

Tónlistar- og myndlistarkonan Steinunn Harðardóttir, betur þekkt sem dj. flugvél og geimskip, er að leita að framandi og spennandi dýrum til þess að fara með hlutverk í nýju tónlistarmyndandi sem myndlistarkonan Guðlaug Mía Eyþórsdóttir gerir.

„Við erum að leita að framandi dýrum til að fá lánað eitt síðdegi eða svo til þess að leika í nýja myndbandinu. Fólk má hafa samband við okkur og okkur þætti skemmtilegast að fá einhver dýr sem eru ólögleg, einhverjar slöngur eða tarantúlur,“ segir Steinunn og bætir við að fyllsta trúnaðar verði gætt.

Hún gaf á dögunum út myndband við lagið Hjari veraldar sem er eitt af lögunum sem prýðir plötuna Nótt á hafsbotni sem er væntanleg frá tónlistarkonunni.

Viðfangsefni plötunnar er hafsbotninn. „Ég færði mig niður á hafsbotninn, mér fannst það liggja beint við. Ef maður fer alveg niður á dýpsta hafsbotninn þá er hann kolsvartur og dimmur og þar hittir maður fyrir lýsandi fiska og þeir minna svolítið á lýsandi stjörnur í geimnum,“ segir hún en viðfangsefni fyrri plötu hennar, Glamúr í geimnum, var geimurinn sjálfur. „Hafsbotninn er líka ekkert meira kannaður en geimurinn. Þannig að maður getur gefið hugmyndafluginu lausan tauminn.“

Steinunn hélt út fyrir borgarmörkin til þess að vinna plötuna og dvaldi þar ein í gömlu húsi sem að hennar sögn er reimt í. „Ég var þarna ein í viku í dimmasta skammdeginu. Það var mjög mikill snjór og mjög mikill kuldi og alltaf að blása vindur inn,“ segir hún.

Vegna umhverfisins var tónninn í plötunni annar en hún lagði upp með. „Ég ætlaði að fara að gera einhverja sumarsmelli en öll lögin urðu drunga- og óhugnanleg af því ég var svo hrædd.“

Steinunn er spennt fyrir því að gefa nýju plötuna út. „Ég er mjög spennt, er byrjuð að laumast til þess að spila eitt og eitt nýtt lag á tónleikum en er að reyna að halda aftur af mér svo ég geti haldið útgáfutónleika og spilað öll lögin.“

Þeir sem eiga spennandi og óvenjuleg gæludýr geta hafa samband við Steinunni í gegnum netfangið geimskip@gmail.com.

Hér má sjá tónlistarmyndband við lagið Hjari veraldar: