Bragðað á Katalóníu

Katalónska húsið á Íslandi, í samstarfi við Café Lingua, bjóða í kvöld áhugasömum í Grófarhús á viðburð þar sem hægt verður að fræðast um Katalóníu, katalónsku og bragða á tapasréttum og þjóðlegum kræsingum.

„Það verður kennsla í hvernig á að gera réttinn Pa amb tomàquet og við munum kynna hvernig við gerum þetta, sem er alveg hundrað prósent katalónskt. Það verður tilbúið eftir þrjátíu sekúndur,“ segir Xavier Rodriguez, stofnandi Katalónska hússins á Íslandi og hlær.

Pa amb tomàquet er einfaldur og bragðgóður réttur sem gerður er úr tómötum, brauði, ólífuolíu og salti.

Félagið Katalónar á Íslandi, sem stofnað var af Xavier árið 2008, stendur fyrir ýmis konar dagskrá og segir hann starfið einkennast af félagsstarfi en helsta markmið félagsins er að Katalónar og aðrir áhugamenn á Íslandi um sjálfsstjórnarhéraðið hittist og njóti menningar og samskipta hverjir við aðra.

Í febrúar stendur félagið fyrir árlegum viðburði sem einkennist af katalónskum mat og skemmtun og Xavier segir að kalla megi það eins konar katalónskt þorrablót. „Við köllum það bara þorrablót, það er smá svona brandari á milli okkar,“ segir hann glaður í bragði. En ætla má að matarmenningin í Katalóníu eigi ekki mikið sameiginlegt með íslenskum þorramat.

Á katalónska þorrablótinu verður boðið upp á sérstakan þjóðarrétt sem búinn er til úr calçot, lauk sem svipar mjög til púrrulauks, og er í hávegum hafður en hann er ófáanlegur hérlendis og því pantar félagið allt að sjö hundruð stykki að utan.

Allir eru boðnir velkomnir á viðburðinn sem haldinn er í samstarfi við Café Lingua og fer fram í Grófahúsinu, Tryggvagötu 15, og hefst klukkan sex.