Eldbarnið æft við upphaf eldgoss

„Svo gerist það þegar við erum að æfa að það byrjar að gjósa norðan Vatnajökuls,“ segir Pétur Eggerz, leikari og handritshöfundur barnaleikritsins Eldbarnið sem Möguleikhúsið setur upp í febrúar. Hann bætir við: „Góð áminning um það hvað við erum að fjalla um í þessu leikriti hvernig þetta land er sem við búum í. Hvað fólk hefur þurft að fást við.“

Eldbarnið fjallar um unga stúlku sem er uppi á tímum Skaftárelda og Móðuharðinda. Hún lendir í kjölfar hamfarana í ævintýralegum aðstæðum. Pétur segir umfjöllunarefnið því hafa öðlast nýtt vægi við upphaf eldgossins í Holuhrauni.

Möguleikhúsið fagnar 25 ára afmæli á árinu og stefnir á að bjóða upp á veglega afmælisdagskrá, en leikhúsið leggur áherslu á leiksýningar fyrir börn og unglinga.

Fjáröflun fyrir sýninguna er hafin á vefsíðunni Karolinafund og hægt er að styrkja sýninguna frá fimmtán hundruð krónum og allt upp í fimmtán milljónir.

„Ef einhver stórhuga fjárfestir hefur áhuga þá er hægt að fá þessa sýningu fyrir alla skóla á landinu. Maður má alltaf vera bjartsýnn,“ segir Pétur kátur.

Eldbarnið verður frumsýnt 7. febrúar í Tjarnarbíói, en sýningin er einnig hugsuð sem ferðasýning fyrir grunnskóla landsins.