Fimm mánaða nálgunarbann: Börn og vinir þeirra vitni að ofbeldinu

Karlmaður hefur verið úrskurðaður í fimm mánaða nálgunarbann vegna ofbeldis í garð eiginkonu sinnar til tíu ára. Vitni urðu að árásum mannsins á eiginkonu sína en maðurinn neitar alfarið sök og segir þau öll ljúga. Hæstiréttur staðfesti ákvörðun Héraðsdóms Suðurlands.

Maðurinn var dæmdur í fjögurra vikna nálgunarbann fyrr í sumar en lögreglustjórinn á Suðurlandi telur vægari úrræði en áframhaldandi nálgunarbann ekki munu vernda friðhelgi og tryggja öryggi konunnar og barna þeirra. Maðurinn hafi ítrekað brotið gegn fyrra nálgunarbanni með sms skilaboðum.

Hjónin hafa verið gift í tíu ár en verið í sambúð í ellefu. Þau fluttu til landsins fyrir einu og hálfu ári. Kemur fram í greinargerð lögreglu að ofbeldi, bæði líkamlegt og andlegt, hafi verið viðvarandi í sambandinu undanfarin ár. Lýsir konan fjórum skiptum undanfarin tvö ár þar sem maðurinn réðst á hana, síðast í apríl 2015.

Aukið ofbeldi samhliða aukinni drykkju

„Hafi ofbeldið falist í því að hann hafi slegið og sparkað í hana, þ.á m. þegar hún hafi legið í gólfinu, hent henni til og ítrekað kýlt hana með krepptum hnefa í andlit og höfuð. Börn þeirra hafi orðið vitni að ofbeldinu, og auk þess vinir þeirra í a.m.k. tvö síðustu skiptin sem líkamlegt ofbeldi hafi átt sér stað,“ eins og segir í greinagerð lögreglustjórans.

„Brotaþoli hafi skýrt frá því að ofbeldishegðun varnaraðila hafi stigmagnast nú undanfarið, jafnhliða aukinni drykkju hans. Nú væri svo komið að bæði hún og börnin óttuðust varnaraðila, og reyndu öll að láta lítið fyrir sér fara í þeirri von að þannig takist að halda friðinn á heimilinu.“

Manninum er óheimilt að koma á svæði sem afmarkast af 50 metra radíus frá miðju húss þeirra og jafnframt má hann ekki veita henni eftirför, heimsækja eða vera á nokkurn hátt í sambandi við hana.

Úrskurð Hæstaréttar má lesa í heild sinni hér.