Kveður hvítvín og kolvetni í fimm vikur

Ásdís Rán Gunnarsdóttir, ísdrottning og athafnakona ákvað að hefja árið með trompi og hefur sagt skilið við kolvetni og hvítvín í fimm vikur.

„Ég sem sagt ákvað að taka þátt í lífstíls átaki hjá Þorbjörgu Hafsteinsdóttur og GLÓ í Fákafeni. Hún er með tíu árum yngri á fimm vikum og ég er að fylgja sérstöku matarprógrammi þar sem er eiginlega ekkert um kolvetni en rosa mikið af hollri fitu,“ segir Ásdís glöð í bragði.

Hún ber matarræðinu vel söguna og segist líða þrælvel. „Ég er ekkert að pína mig þannig og er ekkert svöng,“ segir hún og bætir við að hún snerti ekki við hrísgrjónum, brauði og öðrum afurðum sem innihalda kolvetni. „Ég er miklu orkumeiri og er ferskari á morgnanna, ekkert slen og engin þyngd yfir manni. Maður verður bara rosalega ferskur,“ segir hún ánægð með árangurinn.

Ásdís er mikil hvítvínskona og segir að mesta áskorunin við matarræðið fólgna í því að sleppa köldu hvítvínsglasi með góðri máltíð. „Að geta ekki gripið í hvítvínið með einhverjum góðum mat er svolítið erfitt. Ég er búin með sex daga og það eru alveg þrjátíu eftir, ég vona að ég nái að haldast í þennan tíma.“

Á morgnana drekkur hún sérstakt kaffi. „Þegar ég vakna á morgnana fæ ég mér kaffi, set eina matskeið af kókosolíu, eina matskeið af smjöri og smá bút af kakaósmjöri út í. Þannig ég er að drekka alveg massa fullt af fitu á morgnana,“ segir Ásdís hress.

Hún segir kaffið betra en hún bjóst við í fyrstu. „Það er fínt, ég bjóst ekki við að þetta yrði drekkandi en svo er þetta bara feitt og djúsí kaffi. Á að næra mann að innan og ég á að líta út fyrir að vera tuttugu og fimm eftir fimm vikur,“ segir hún og skellihlær.

„Á fimmtudaginn byrja ég svo á djúskúr hjá Gló í 7 daga og fæ þar 6 kaldpressaða djúsa á hverjum degi úr ýmsu góðu grænmeti og ávöxtum, þetta verður eflaust strembið en ég hlakka til að sjá afraksturinn og breytingu á líkamanum.“

Það er nóg um að vera hjá Ásdísi þessa dagana en í gær opnaði hún vefsíðuna sína, Icequeen.is þar sem birtast munu ýmsar fréttir úr daglegu lífi fyrirsætunnar, „beauty tips“, heilsupistlar, myndbönd og annað skemmtilegt. Í gær birti hún mynd af sér þar sem hún lék eftir mynd af Kim Kardashian West þar sem sú síðarnefnda beraði á sér bossann. „Þetta er bara svona í takt við nútímann og hvað á ég að segja, öld sjálfsmyndanna.“