Dagur hafði betur gegn Geir

Dagur Sigurðsson hafði betur gegn Geir Sveinssyni í þýsku úrvalsdeildinni í handbolta, en kapparnir mættust með lið sín Füchse Berlin og Magdeburg í dag.

Fyrri hálfleikurinn var virkilega jafn, en Füchse Berlin leiddi með tveimur mörkum í hálfleik 16-14.

Þeir héldu svo vel á spilunum í síðari hálfleik og unnu að lokum fimm marka sigur, 32-27.

Peter Nenadic gerði níu mörk fyrir Füchse Berlin, en Tomasz Gebala skoraði átta mörk fyrir gestina í Magdeburg.

Eftir sigurinn er Füchse í sjötta sæti deildarinnar, en Magdeburg missti þriðja sætið til Flensburgar.