Joni Mitchell talin ná fullum bata: „Hefur ekki gefist upp“

Kanadíska tónlistarkonan JoniMitchell er sögð með meðvitund og er talið að hún muni ná fullum bata. Þetta segir talsmaður Mitchell í yfirlýsingu sem birtist á vefsíðu hennar en hún hefur legið á sjúkrahúsi síðan í lok mars eftir að hafa fundist meðvitundarlaus á heimili hennar í Bel Air í Bandaríkjunum.

Bandaríska vefsíðan TMZ.com greindi frá því fyrr í gær að Joni væri meðvitundarlaus og ekki væri von á að hún myndi ná sér. Sagðist TMZ hafa undir höndum skjal sem náinn vinur Mitchell, LeslieMorris, lagði fram til að fá forsjá yfir tónlistarkonunni til að gæta hagsmuna hennar á meðan hún liggur meðvitundarlaus á sjúkrahúsi.

Nokkrum klukkustundum eftir að TMZ greindi frá þessu birti einn af talsmönnum Mitchell yfirlýsingu á heimasíðu hennar þar sem hann greindi frá því að Mitchell væri með meðvitund. „Hún er sögð ná fullum bata. Skjalið sem ákveðinn miðill vísar í veitir vini hennar til langs tíma, LeslieMorris, vald til að taka ákvarðanir fyrir Joni. Eins og við vitum öll þá er Joni sterkur einstaklingur og hefur ekki gefist upp.“