Róbert meistari með PSG

Róbert Gunnarsson og félagar í Paris Saint-Germain urðu í kvöld franskir meistarar.

Þetta var ljóst eftir risasigur Paris á Tremblay á útivelli, 20-36, í lokaumferð frönsku úrvalsdeildarinnar. Róbert skoraði fimm mörk og var næstmarkahæstur í liði Paris ásamt Luc Abalo. Danska stórskyttan Mikkel Hansen skoraði mest fyrir Paris, eða 10 mörk.

Paris endaði með 46 stig, einu meira en Montpellier. Saint-Raphael endaði í 3. sæti en liðið vann tveggja marka sigur á Dunkerque í kvöld, 23-21. Arnór Atlason skoraði þrjú mörk fyrir Saint-Raphael.

Snorri Steinn Guðjónsson skoraði eitt marka Sélestat sem tapaði fyrir Créteil á heimavelli, 28-30. Sélestat er löngu fallið niður um deild en Snorri mun ekki leika með liðinu á næstu leiktíð.

Leikstjórnandinn knái er á leið til Nimes sem tapaði 29-27 fyrir Cesson-Rennes á útivelli. Ásgeir Örn Hallgrímsson gerði tvö mörk fyrir Nimes sem endaði í 8. sæti deildarinnar.