Verkföll framundan hjá Starfsgreinasambandinu

Síðdegis í dag slitnaði upp úr samningaviðræðum Starfsgreinasambandsins og Samtaka atvinnulífsins eftir klukkustundarfund í húsakynnum ríkissáttasemjara. Deiluaðilar komu saman til fundar klukkan fjögur og luku honum með því að slíta viðræðum rétt fyrir klukkan fimm.

Í tilkynningu frá SGS segir að það séu mikil vonbrigði að Samtök atvinnulífsins voru ekki tilbúin til að koma til móts við kröfur um að lægstu laun verði komin upp í 300 þúsund krónur innan þriggja ára. Því sé sambandið „nauðbeygt til að hefja undirbúning aðgerða og leita heimildar hjá sínum félögum til verkfallsboðunar.“

Samtökin segja að þau átök á vinnumarkaði sem þetta hafi í för með sér sé afleiðing annars vegar skilningsleysis SA á þeim launum sem fólk þarf til að lifa af og hins vegar stjórnvalda sem brugðust algerlega í þeirri tilraun sem gerð var fyrir rúmu ári síðan með hóflegar launahækkanir og aukinn kaupmátt. „Til þess að sú tilraun gengi upp þurftu allir að taka þátt en svo er einfaldlega ekki. Samstaða innan samninganefndar Starfsgreinasambandsins er fullkomin og viðræðurslit voru samþykkt einróma af öllum fulltrúum þeirra 16 aðildarfélaga sem SGS fer með samningsumboð fyrir.

Uppfært 17:30:

Samtök atvinnulífsins hafa sent frá sér tilkynningu vegna málsins:

„SGS hafnar stöðugleikanum

Starfsgreinasamband Íslands sleit í dag samningaviðræðum við Samtök atvinnulífsins um endurnýjun kjarasamninga. SGS hafnar nálgun SA um að halda áfram að byggja upp kaupmátt launa á grundvelli verðstöðugleika. Í stað þess er nálgun SGS að krefjast tugprósenta launahækkana sem mun leiða til mikillar verðbólgu á skömmum tíma og stökkbreyta verðtryggðum skuldum heimila og fyrirtækja, hækka vexti og fella gengi krónunnar.

SA hafa á undanförnum vikum lagt fram ítarleg gögn og greiningar á samningafundum með SGS og hjá ríkissáttasemjara sem sýna að sú leið sem Starfsgreinasambandið vill fara er ófær. Verði hún farin mun hún valda samfélaginu miklu tjóni og gera að engu þann mikla árangur sem náðist í kjölfar síðustu kjarasamninga á almennum vinnumarkaði.

SGS boða verkfallsaðgerðir en tjón sem verkföllin munu valda er alfarið á ábyrgð sambandsins. Samtök atvinnulífsins geta undir engum kringumstæðum fallist á að leggja upp í ferð sem vitað er að muni enda með ósköpum.“