Októberspá Siggu Kling – Sporðdreki: Ekki svara fortíðinni

Elsku hjartans Sporðdrekinn minn. Þú ert svo mikil tilfinningavera en þér er oft illa við að láta tilfinningar þínar í ljós.

Fólkið í kringum þig þarf að vita hvað þú vilt og hvernig þér líður og þá sérstaklega þeir sem þú elskar, það gerir ekkert nema gott.

Nú er góður tími til að sækja um spennandi verkefni eða stöðu sem hressir þig við, það er ekki eftir neinu að bíða!

Hristu upp í hlutunum kringum þig og vittu til, ýmislegt mun koma í ljós. Slepptu allri þolinmæði og geymdu hana bara þangað til eftir áramót, þá er gott að nýta hana. Þú ert að að þjálfa huga þinn til að sjá það góða í öllum aðstæðum, það breytir öllu. Ef fortíðinni dettur í hug að hringja í þig skaltu ekki svara því hún hefur ekkert að segja.

Fyrsta skrefið til að fá það sem þú vilt er að hafa hugrekki til að henda því sem þú vilt ekki. Hugrekki þýðir ekki að þú verðir ekki hræddur heldur að þú látir hræðsluna ekki stöðva þig.

Taktu engar ákvarðanir þegar þú ert í vondu skapi, segðu helst bara ekki neitt ef það þyrmir yfir þig.

Þú átt eftir að láta mörgum líða vel og það er þáttur í þessu spennandi karma sem er að koma, fólk gleymir hvað þú segir og hvað þú gerir en það man alltaf eftir því hvernig þú lætur því líða.

Það er sko engin tilviljun hvaða fólk það er sem kemur inn í líf þitt næstu þrjá mánuði og vertu tilbúinn að henda þægindarammanum, elsku Sporðdrekinn minn.

Mottó: Það er gott að elska.

Frægir Sporðdrekar: Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti, rappari.