Hannar jarðlituð týpuföt á ungbörn

Jarðlituð, kynlaus og vönduð týpuföt, líkt og fullorðna fólkið klæðir sig oft í, á lítil börn er framlag Fanneyjar Svansdóttur í flóru barnafatatískunnar á Íslandi í dag. Hún hannar, framleiðir og selur fatnaðinn undir merkinu Ylur.

„Ég kýs að hafa hlutina einfalda og stílhreina, og fannst barnafatatískan alltof bleik og blá,“ segir Fanney um kveikju hugmyndarinnar. Fanney hefur alla tíð verið áhugasöm um tísku en fór ekki að gefa barnatísku gaum fyrr en hún varð sjálf ófrísk. Dóttir hennar er nú eins og hálfs árs og mögulega eitthvert best klædda barn bæjarins.

Hvað gera konur þegar þær sjá gat í markaði? Jú, þær fylla það. Vinsældir týpufata á börn eru gríðarlegar um þessar mundir og segir Fanney vissulega trend í gangi í þessum anga tískunnar eins og öðrum.

„Sinnepsgulur hefur til dæmis verið afar eftirsóttur litur hjá mínum viðskiptavinum,“ 

Fanney leggur mikið uppúr þægindunum í takt við gæði, og prjónar einungis úr merínóull, sem er hlý, mjúk og stingur ekki litla kroppa. 

Sjálfmenntuð af netinu

„Ég hafði ekki prjónað annað en fjölmarga trefla í gegnum tíðina svo þetta var áskorun.“

Þrátt fyrir reynsluleysið beið Fanney ekki boðanna og leitaði á náðir YouTube og Pinterest þar sem hún lærði helstu trixin. 

„Í framhaldinu kenndi ég mér svo að hekla og síðan hef ég ekki stoppað.“

Eins og staðan er núna leggur fólk inn pantanir og Fanney mundar prjónana. Þó er sjaldan stund milli stríða því Fanney hefur lengi reynt að koma sér upp lager án árangurs, þvílík er eftirspurnin. 

„Það er auðvitað takmarkað hvað tvær hendur komast yfir í einu, en ég er eini starfsmaðurinn,“ segir Fanney kímin. 

Óhætt er að fullyrða að Fanney sitji sjaldan auðum höndum en samhliða því að prjóna látlaust eftir pöntunum nemur hún félagsráðgjöf við Háskóla Íslands og útskrifast í vor. 

„Eftir útskrift fer allt á fullt, en ég er þegar komin með heilan helling af hugmyndum sem þurfa að komast í framkvæmd,“ segir þessi framtakssama kona að lokum.